26/4/17

ENCONTRO CON RAQUEL CASTRO

Este curso en 5º e 6º lemos teatro, unha das obras que lemos foi "As terapias da doutora Ledicia". Tivemos a estupenda oportunidade de conversar coa autora na nosa Biblioteca.

Puidemos saber como foi que naceu esta obra, o porqué da elección dos personaxes, e ata aportamos algunha idea para unha posible segunda  parte. Encantounos falar con Raquel, que tamén nos contou que ten unha novela a punto de sair, e por suposto xa queremos coñecela.
Moitas grazas!

25/4/17

QUE NOS RECOMENDAS?

Xa temos as primeiras recomendacións das lectoras que se achegaron  á Biblioteca para participar nesta actividade. Moitas grazas a todas elas. 
Continuará!

        

        

24/4/17

DÍA DO LIBRO: "CONTAPATIO"

Chegou o Día do Libro e de novo o "Contapatio", actividade de lecturas compartidas. Este ano os lectores e lectoras foron de 3º, 4º, 5º e 6º. Como sempre o patio mudou para ser un lugar de concentración onde só se escoitan os baixiños murmurios da lectura, momentiños de paz en boa compaña e arredor dunha historia , "soando nas nosas cabezas a música da maxia ceiba", como di o texto co que Rosalía Fernández Rial  nos agasallou este ano ás Bibliotecas Escolares de Galicia.






O alumnado de 3º, que por primeira vez lía para os demais, manifestou o seu entusiasmo no seu blog de aula.

Continuamos coa programación de abril da que seguiremos dando conta nos próximos días!

22/4/17

DÍA DA TERRA

Para lembrar que o planeta nos da vida e sustento, a Asamblea Xeral da ONU designou o 22 de abril como "Día internacional da nai Terra". A campaña deste ano denomínase "Alfabetización medioambiental e climática", tan necesaria para garantir a sustentabilidade, o equilibrio entre o progreso e o respecto pola natureza.
Este curso estamos adquirindo moitos coñecementos a través do cultivo da nosa horta e da elaboración de compost como fertilizante natural. 
 Así vai marchando o noso traballo:








18/4/17

COÑECEMOS A TORIBIO

 Begoña, a mamá de Fins, veu ao cole para presentarnos a Toribio.
Toribio é un personaxe dunha serie de libros de Carlos Casares, o autor ao que este ano adicaremos o Día das Letras Galegas.
Primeiro coñecemos o personaxe e despois escoitamos unha das súas aventuras.














































Moitas grazas Begoña, gustounos Toribio, procuraremos outras aventuras!

7/4/17

ARTE NA BIBLIOTECA

Comezamos as actividades de abril con arte, coa exposición dos traballos dunha nai da escola que nos deixou abraiados co seu talento. Patricia Vilas di que pinta por afición e que sinte predilección polo retrato, iso comentou co alumnado de 5º, con quen mantivo unha pequena entrevista.
A exposición estivo aberta a toda a comunidade educativa durante unha semana.
No seguinte vídeo resumimos a actividade, podemos admirar parte dos traballos de Patricia e ver o interese que espertou nos visitantes.

3/4/17

SOPA VERDE

Lectura para os nenos e nenas de E. Infantil: Sopa verde
A encargada: Bea, a mamá de Eloy 

É unha historia con estrutura repetitiva que nos familiariza cos nomes de moitas hortalizas e as súas cores, animando a introducilas na nosa alimentación.



31/3/17

SAÍDA AO CIFP A GRANXA

O alumnado de 4º, 5º e 6º estivo onte no Centro de Formación profesional A Granxa, onde se imparte un ciclo de Produción Agroecolóxica. Pasamos unha mañá moi agradable, miramos, escoitamos, experimentamos e trouxemos moita información para o noso proxecto. 
Moi agradecidos por tan boa acollida!


21/3/17

COMPARTIMOS POESÍA

Hoxe, Día Mundial da Poesía, os voluntarios e voluntarias de 5º visitaron as demais aulas na Hora de Ler para ofrecernos POESÍA.

 Leron para nós e deixáronnos a selección de poemas nas aulas para que puidésemos lelos moitas veces!

      
 
Aos máis grandiños tocounos un conto rimado: "A tea de araña que todo o apaña",de Xoán Babarro,  do que recollemos uns fragmentos da lectura a cargo de Juan e Ángel:
 
         
Related Posts Plugin for WordPress, Blogger...